Teruglezen: De eerste speech van de nieuwe voorzitter Kevin Hoffmans

RedactieAlgemeen, Bestuur

Op een drukbezochte algemene ledenvergadering is iedereen ermee ingestemd dat Kevin Hoffmans de nieuwe voorzitter van Sportclub Susteren mag zijn. Het woord was dan ook aan hem, waarin hij ervoor koos om zijn 28 jarig bestaan te koppelen aan de club, het bestuur en aan Wim Fiddelaers.

De speech begint onder de foto.

Wat mosse zegge taege eemus mit 30 jaor berstuurservaring wovan 28 jaor es veurzitter. Wie Wim veurzitter is gewaore in 1991 wis ich auch neet wat is moos zegge. Mer misjien koom det doordet ich pas un hauf jaor auwt woor. In de lètste besjtuursvergadering presenteerdes doe un prachtige presentatie euver dien periode es veurzitter. Ut is noe tied veur miene kantj van ’t verhaol. Wie höb ich dich gezeen in mien 28 laevesjaore.

Wie ich mit 5 jaor begoos mit voetballe, vilt dich unne veurzitter neet op. En det hoof auch neet. Unne coördinator of trainer zulle dich in eerste instantie motte lere wat dien chocoladebein is en wie se taege unne bal mos trappe. In mien geval woor det ’t eerste jaor van Noud van Naer es jeugdcoördinator. Det op de achtergrondj un gans plan loog om de jeugd nao un hoager niveau te tille mit Noud es de nuuje jeugdcoördinator, heij ich gein flauw idee van.

Mit mien 7 jaor oud sjting ich es ein van de ieëste mit nuuj voetbalsjoon op ’t huidige hoofdveld. Op det moment zoote mien gedachte bie dae ballon, want dae moos zoa wied meugelijk weg vleege om unne pries te wènne. Det Wim es Veurzitter dao de äöpening verzörgde en same mit de res van ’t besjtuur en vrijwilligers 5 jaor heije gewirkt aan ’t oetdènke en oetveure van det plan, koom gaar neet in mich op.

Mien ieëste kampioensjap behaolde ich in de F1. De medaille zal vas nog urgus ligge en ’t t-shirt mit de teamfoto op, lik bewaard oppe zölder. Det die F1 toentertied in un besjtuurskamer is geneump omdet ze bienao kampioen zoewe waere, wis ich toen nog neet.

’t Sjoalevoetbaltoernooi woor veur mich niks anges den aan de res van de klas te laote zeen wat ich al neet allemaol koos. Aafsjpele deeg ich neet gaer, want ich wool oeteindelijk wènne van mien teamgenootjes die in un anger team zoote. Mer det det toernooi ein van de grotste wervingsacties van de club woor en vriewilligers zich dao vriej veur heije gepakt, dach ich gaar neet euver nao.

Naarmate se auwer wurs en op groaat veld geis voetballe, waere der keuzes gemaakt. Zoa ging ich nao sjlechs ein jaor in de E gevoetbald te höbbe, vervreugd nao de D2. Sommige vriendjes bleve achter, sommige mochte nao de D1 en sommige ginge mit mich mit. Det achter de sjerme hiej door un deil man lang euver gepuzzeld is gewaore en der achter elke mutatie un idee zoot, wis ich neet.

Pas wie de beergrens van 16 woort bereik en Wim Peters mich de pils insjödde, kwoom ’t besef wie un voetbalclub ongeveer inein zoot. Aaf en toe zoogse de ‘heren’ in en oet de besjtuurskamer laupe en soms sjtinge ze zelfs langs de kantj te kieke. Det auch zie ’t beer lekker vonje, merkte ich al gauw. Ze bestèlde in dae tied sjneller den mich en ich dink det dao ’t ieëste röndje van de veurrrrrzitter oet gekaome is. Mien raeje woor om op vriedigaovend te vieren det ich weekend heij. Mer misjien woor hun raeje waal om te vieren det de jaorraekening aaf woor en det der un positief saldo sjting.

Op mien 18de moch ich nao mien mien debuut bie ‘t 3de en 2de auch mitdoon bie ’t 1ste elftal. We wonne mit 3-0 en ich heij ein dink geleerd. Es tim van Naer bie unne hoage bal ‘ICH’ reep, den mot ich dao fijn vanaaf blieve. Mer det d’r un beleid woor (en nog altied is) om trainers ’t gebroek van jeugdspelers te stimuleren, wis ich toen neet.

Einmaol op sjoal in Tilburg, woor ich al sjnel d’roet det ich get mit social media / online marketing wool gaon doon. Dit resulteerde d’rin det ich op 30 januari 2014 De Facebookpagina van Sportclub Susteren heij aangemaakt, en noe kump ’t, det wos ’t bestuur neet.

Sindsdien zoot ich op de radar van Wim en co. Want es eemus zich betrokken veult bie de club en bepaalde zaken in de toekomst zoe kenne gaon doon, is de kans groaät det ’t besjtuur dich op un ongesjreve lieske haef sjtaon. Dit resulteerde in enkele pisbek-gesprekke mit Wim woobiej hae uns wool polse of dae jong van 24 misjien waal aore heij om in ’t bestuur te komme. Nou, die oare die heij ich waal. En door eers informeel te kalle en later ech aan taofel te zitte om un concrete functie te gaon besjpraeke, bön ich ff later besjtuurslid gewaore. Pas toen ontdekte ich det zie 1x per 4 waeke un algemein vergadering heije en 1x per 3 waeke un vergadering veur ’t dagelijks besjtuur.

In miene tied es besjtuurslid höb ich de grotste waardering gekrege veur de luuj mit in ’t biezunjer veur Wim. Unne man mit hieël väöl kennis en kunde in zich. Unne man dae alles tot in puntjes haef veurbereid en oetgedach. Unne man dae op momenten de rös bewaart en op momenten zien sjtöm verhöf. Unne man dae altied de club centraal sjtelde es angere det misjien neet woole.

Wim, ich höb in die periode väöl van dich gelieërd en wil dich den auch bedanke veur de meneer wies doe det gedoerende 30 jaor veur Sportclub Susteren höbs ingevöld. Ut is veur mich un hieële groate ieër om dich op te volgen en tevens un haos onmeugelijke taak om diene inzet en passie es vriewilliger te evenaren.

Proficiat namens ’t ganse besjtuur en ich kin dich vertelle det wer same mit de luuj van ’t besjtuur dich in de watte gaon ligge tijdes un 2-daagse citytrip nao Amsterdam.

Weer höbbe nog ein klein aandenke veur dich om os neet vergaete. En daobiej kump unne quote van dich truuk dae weer neet zulle vergaete (en dit zeen ech mien letste weurd)

“Same zulle weer os clupke drage, in gooj mer auch in sjlechte daage”.

Bedankt veur alles!